Саўдыты збілі іранскі дрон кітайскім лазерам

Беспілотнік быў запушчаны хусітамі.

Пра першае паспяховае баявое выкарыстанне кітайскай лазернай сістэмы СПА расказалі сёння на міжнароднай зброевай выставе DSA 2024. Паведамляецца, што лазерную зброю выкарыстоўвала Саудаўская Аравія, каб падбіць запушчаны хусітамі беспілотнік іранскай вытворчасці, паведамляюць «Дэталі».

Сістэма называецца Silent Hunter («бясшумны паляўнічы») і прызначаная для паразы паветраных цэляў лазерным промнем. Заяўлена, што на адлегласці 800 метраў яна прапальвае пяць 2-міліметровых стальных пласцінаў запар.

«Паляўнічы» ўсталяваны на грузавіку падвышанай праходнасці. Ягоныя радары аптымізаваныя пад пошук беспілотнікаў. А лазер магутнасцю 30 кВт наўрад ці здольны справіцца з больш сур'ёзнай паветранай цэллю.

Гэта адрознівае кітайскую зброю ад ізраільскага супрацьпаветранага лазера «Жалезны прамень», ён жа вядомы пад назвай «Светлавы шчыт», які знаходзіцца цяпер на фінальнай стадыі выпрабаванняў. Апошні яшчэ ў 2020 годзе дэманстраваў паразу цэляў на адлегласці 7 км.

Мяркуецца, што магутнасць ізраільскага лазера – не меншая за 100 кВт. Ён прызначаны для паразы значна хутчэйшых, чым дроны, цэляў, напрыклад мінамётных мінаў.

Падобныя сістэмы распрацоўваюць розныя краіны. Сёлета Вялікая Брытанія дала справаздачу пра паспяховае выпрабаванне лазера DragonFire («Агонь цмока»), ім плануецца абсталёўваць баявыя караблі.

ЗША ў сакавіку паведамілі, што праводзяць баявыя выпрабаванні ўласнага 50-кілаватнага лазера СПА SHORAD. Ён прызначаны для збіцця беспілотнікаў. Ужо некалькі комплексаў разгорнутыя на Блізкім Усходзе для баявых выпрабаванняў.